O vigués fixo unha proba redonda, ao estar sempre entre os mellores nos tres sectores. Saíu da auga na cuarta posición e logrou así meterse no primeiro grupo na bicicleta, formado por doce homes. Serrat estivo moi activo, dando relevos para manter a escapada e deixar fóra da mesma aos máis débiles. Na última volta do segmento de bicicleta caeu do grupo un dos favoritos, o portugués Joao Silva, que ademais sufriu unha picada, o que xa lle deixou sen opcións de loitar polo podio.

Á segunda transición chegou un grupo de cinco triatletas -o portugués Joao Pereira, Antonio Serrat, Antonio Benito, o serbio Stojanovic e o francés Vitiello-, con 44 segundos da vantaxe sobre o segundo grupo. Pero moi pronto o trío formado por Pereira, Serrat e Benito logrou desmarcarse do resto de competidores para deixar claro que as medallas sería cousa de eles.

Fixeron xuntos a primeira parte da carreira a pe, pero a dous quilómetros para o final, Serrat acelerou o ritmo e Benito non puido mantelo, quedando descolgado uns metros. No último quilómetro foi Joao Pereira o que se mostrou intratable, cun ritmo infernal, que Serrat non puido aguantar. Así o triunfo foi para Joao Pereira cun tempo de 57:28, mentres que a prata foi para Antonio Serrat (57:45) e o bronce, para Antonio Benito (57:57).

Esta prata de Serrat ten aínda máis valor, xa que o vigués chegaba a esta proba aínda tocado pola forte escordadura de nocello que sufriu en Italia a comezos do mes, mentres adestraba para participar na Copa do Mundo de Tríatlon de Cagliari. Xa non puido disputala e aínda que competiu unha semana máis tarde na Serie Mundial de Leeds, fíxoo tocado e rematou na 18a posición. Estas semanas estivo en tratamento e aínda non está recuperado, pero a forza e as ganas de Serrat puideron sobre as molestias físicas.

Os Xogos do Mediterráneo disputáronse en Altafulla sobre a distancia sprint, de forma que os deportistas fixeron 750 metros de natación, 20 quilómetros de bicicleta e 5 quilómetros de carreira a pe.