A Veiga acollerá a proba cicloturista «Gran Fondo Trevinca Starlight»

0
Presentación de "Gran Fondo Trevinca Starlight".- Na sala de xuntas do Pazo Provincial terá lugar a presentación da proba deportiva "Gran Fondo Trevinca Starlight", acto no que participará o vicepresidente da Deputación de Ourense, Rosendo Fernández; o alcalde da Veiga, Juan Anta; e o director deportivo do evento, David Álvarez.
  • A Deputación de Ourense colabora con este evento deportivo que ofrece tres posibles distancias e que conta actualmente con máis de 170 inscritos 

O Concello da Veiga acollerá, o día 15 de marzo, a proba cicloturista popular «Gran Fondo Trevinca Starlight», un evento deportivo que destaca polas súas paisaxes, a dureza e a singularidade do seu percorrido que atravesará diferentes pobos do municipio. A presentación desta proba tivo lugar hoxe no Pazo Provincial, acto no que participou o vicepresidente da Deputación de Ourense, Rosendo Fernández; o alcalde da Veiga, Juan Anta; e o director deportivo do evento, David Álvarez.

«Gran Fondo Trevinca Starlight» é unha «maridaxe perfecta de natureza e deporte na cima de Galicia», dixo Rosendo Fernández. Neste mesmo sentido, o alcalde da Veiga explicou que o obxectivo deste evento é «poñer en valor o noso concello e que a xente coñeza as particularidades dos nosos pobos coa súa especial orografía». Así mesmo, Juan Anta sinalou que se trata dunha «proba de emocións que volve ao rural profundo». 

A proba, que comezará ás 10.00 horas desde a Praza do Concello da Veiga, é un evento «único e diferenciador, con tres distancias para que poida ir todo o mundo, que son gran fondo de 100 quilómetros, medio fondo de 75 quilómetros e mini fondo de 45 quilómetros», sinalou David Álvarez, quen adiantou que na vindeira edición «participarán neste evento profesionais por ser un entorno único» e afirmou que non se trata dun evento, senón dun «destino cicloturista único». 

As inscricións, limitadas a un máximo de 300 participantes, poderán realizarse a través da páxina web www.granfondopenatrevinca.com ata o luns ás 23.00 horas. «Ata o momento contamos con máis de 170 inscritos, o que confirma o éxito absoluto desta primeira edición», afirmou Juan Anta.

Nota de prensa de la Deputación de Ourense